إلى كل بنت ناشبة بحلق اهلها
وماتزوجت مع انهم حاطين معها اختها مجــاناْ
,, كيف تصطادين المعرس .>>>>ليه حمامه هو
للإجابة على هذا السؤال إليكِ مايلي :-
,, أهم نقطة نشني على العجوز اللي حاطه
عينك على ولدها ثم نفذي ما يلي :-
1) خليك مع امك لاتروحين مع البنات
وتتهيبلين اصبري عنهن كم شهر
لين تتم العمليه .
2) امشي وانتى حاطة راسك بين كتوفك
لاترفعينه ابد حتى لو يصير كله صعارير ( خلي
الفكس دايم في متناول اليد )
علشان يقولون مؤدبه وماهي متكبرة.
3) كلمة خالة خليها على لسانك وخاصة
لأم المعرس علشان تحس بنوع من التميز عن بقية
العجايز ولامانع تنادين عجوز ثانية بخالة
علشان اذا مانجحت الخطة مع العجوز نمبر ون
تنجح على الثانيه <<< الاحتياط واجب يابنيتي
4) اذا بدت امك تتكلم انغزيها بكوعك
علشان تدخلك بالموضوع حتى لو مالك داعي تطبيقاْ
للمثل ( كثر الطق يكسر الحديد ) ادري المثل ماله داعي بس مالقيت غيره .
5) اخوانك الصغار
لاحقيهم وطامري
معاهم وين مايروحون حتى لو ماهي عادتك بس تصرفي
معهم كانك امهم عشان العجوز تاخذ فكرة انك حريصة على ذريتك
( جعلهم عقبك )
6) كل ما اكلت امك من اكلة زينة خليها تقول :
نفس الأكلة اللي تسويها بنتي
( حتى لو الاكل من المطعم الصيني أو المكسيكي!!! ).
7) اذا جيتي بتمدين ايدك جعلها للكسر <<< خربها
توجعي وخلي امك تقول : قايله لك وانا امك لاتنظفين
جدران الفلة الخارجية بس انتي
الله يهديك ذابحتك
النظافه <<< جعلي ما ابكيك
اجل بتنظفين جدران الفلة نظفي غرفتك أول اللي تقولين
ثايرة فيها قنبلة ذرية
8) اذا تكلموا الحريم عن العرس اكتمي نفسك لين تحمر
خدودك
عشان يقولون البنت تستحي
ومالنا حق تكلمنا عندها << بس لاتكتمي نفسك واجد أخاف تروحين فيها واصير قتلت نفس بغير حق ؟؟!
9) مهما كان موضوع الحوار حماسي لاتبدين رأيك خليك مثل الطرمان
لان اللقافه تجيب اجل الخطه
10) شعرك افرديه لاتخلينه طاير وشوشه
مهما كانت الموضه لان العجايز ما يدورون إلا اللي
شعورهم ناعمه والا اللي شوشهن
طايرة محد يلتفت لهن (مع احترامي للي لهن شوش طايره )
11) إذا أدلت العجوز (أم المتوهق) بأي راي سواء سياسي ولا وطني
ولا اقتصادي وافقي عليه حتى لو انه ماسخ وماله داعي
مثلاْ تقول العجوز: أمس بوش متقهوي
عندنا يا فلانه قولي لها
وليه ماعلمتينا ياخالة نجي نعاونكم؟؟
12) في العروس لا ترقصين :5_1_101[1
واعتبري الرقص عيب وشق جيب
اقضبي ارضك وانثبري.
13) اذا جا طاري السوق وهو طبعا
لازم يجي الطاري لانه ملح الجلسه
عند الحريم خلي امك
تقول ( الله يعظم اجر اميمتك) بناتي
مايطلعون للسوق ابوهم يجيب اغراضهن .
))))))))) احتمــــــــــال وارد الحــــــــــدوث (((((((((
يمكن تكون العجوز منشنه على بنت
غيرك لكن بعد النقاط السابق ذكرها بتصرف نظر
عنك وعنها <<<< امزح لاتصدقين
ماعليناااااااااا المهم اللحين العجوز بتكون وقعت بالفخ
,, نروووووووووح للمعرس
اهجدي في بيت اهلك ولاعاد تطلعين
واذا جا المعرس بيشوفك خلي
ابوك يقول والله ودي
تشوف البنت بدون ماتدري علشان تاخذ
راحتك وانا عمك وبعدين تشوفها على
الطبيعه علشان ماتقول غشيتوني
<< إيه هين يالشايب والله لو بيدك لتحط مكانها
باسكال مشعلاني ولا نوال الزغبي ولا غيرها وغيرها
,, وقبل يجي اليوم اللي بيشوفك فيه
بحوالي اسبوع او اكثر ( على حسب شين وجهك )>>>>أمزح لا تصدقيين
اركضي من صالون
لصالون (صبغه، فرد، تنظيف بشرة ....الخ) لاتخلين على روحك
قاصر ولما يجي المعرس خلي اخوك ياقف جنبه عند الشباك
عشان ما يطوّل بالبحلقة ويبان المستخبي وذلك تطبيق لنظرية اللمحه ذبحه.
,, بعدها عاد كيف بيشوفك هذي عليك
ماهوب كل شي بعلمك اياه
دبري عمرك بس خلي ابوك
بنهاية المشهد يقول : العذر والسموحه
وانا عمك
<< العود ضمن الولد يوم يقوله وانا عمك
ترا البنت حوسه (مع انك طاقه كل زينك ) بس
بهاللحظه الولد بينط على راس ابوك و
يبوسه لين يشفط مخه وبيقول متى العرس ياعم
( اللهم ارحمه فقد كان باراْ بوالديه )
عاد الله يوفقك ولا تنسينا من
حلاوة العرس واياك تعلمين الولد من معلمك
هالعلوم ولا حتى باسمي اتفقنا
(((((((( تحذيــــــــــــــــر ))))))))
ابتعدي عن امهات العيال اللي متعلمات
راعيات الشنطة مثل لون الجزمة
لان هذولي يبيلهم خطط بعيدة المدى
(((((((( نصيحــــــــــــه )))))))))
رفيقاتك بيلاحظون التغيرات المفاجئه
اللي صارتلك فانتي قولي لهم انك
خلاص انسانه عرفتي درب السنع والعداله
كلوووووش منك العيال ومنه المال
وانشالله تعيشون في سبات ونبات
وتخلفون صبيان وبنات
09-04-2008, 08:07 AM
.gif){kind=icon}
إلى كــــل بنت نــاشبه بحلق أهلها.... بدون زعل ياحلاوات
المزاج :
العرض العادي
