المسلسلات الخليجية الى أين؟؟
السلام عليكم و رحمة الله و بركاته
في حد عنده علم بعدد المسلسلات الخليجية المعروضة في شهر رمضان في كل القنوات الخليجية؟
ما أعتقد بأن اي مشاهد في الخليج قدر انه يتابعهم كلهم أو حتى نص المسلسلات المعروضة
و السبب طبعا العدد الهائل من الأعمال الخليجية
و ياريتها أعمال تشرف.. الا كلها أعمال تسيئ للمجتمع الخليجي و تصوره بأن مجتمع مادي بدون قيم و لا أخلاق
في مسلسلاتنا
شرب الخمر والرقص و الاختلاط والجرائم و الخطف كلها اصبحت أشياء عادية لا يخلو منها مسلسل خليجي
طبعا بالاضافة الى مشاكل الورث...كأن كل الناس الى عندهم خير عندهم مشاكل على الورث!
نعم عندنا فساد مثل اي مجتمع في العالم.. و عندنا نماذج سيئة و أسر مفككة
و لكن هي فئات لا تمثل المجتمع ككل ...بعكس الى يصوروونه في المسلسلات الخليجية
كلامي عن المسلسلات الخليجية بشكل عام و بشكل خاص عن مسلسلين : نجمة الخليج - الامبراطورة
"المسلسلين ما شفتهم..شقت لقطات
كيف أحكم عليهم بدون ما أشوفهم؟
و الله اللقطات الى شفتها كفايه و غير الأشياء الى سمعتها من متابعي المسلسلين"
نجمة الخليج
السنه صدمتنا الكاتبة وداد الكواري المعروفة بأعمالها الواقعية بهذا العمل الى يصور أسرة و شخصيات من دبي (العمل كله ما فيه الا 3 اماراتيين يمكن و الباقي من دول الخليج مثل الكويت و قطر البحرين و السعودية) - "مجلس تعاون لازم نتعاون على الخير و الشر"
المسلسل يظهر مجتمع الامارات بانه مجتمع متحرر جدا...و كل شي عادي عندنا.. مع العلم بأن اكثر الأسر تحررا في الامارات و الخليج ما أعتقد ترضى بهالامور "الا فيما ندر"
1- بنت من عايله معروفه و غنية تدخل مجال الفن..و أمها تشجعها على هالشي "اذا في الدول العربية الثانية المتحررة مقارنة بدول الخليج دخول البنت مجال الفن يكون صعب..فما بالكم بالمجتمعات الخليجية؟؟"
2- حتى الأسر المتحررة جدا ما تسمح بحفلات مختلطة (شباب و بنات) في بيوتهم
3- الاختلاط موجود في بعض الجامعات الخاصه في الامارات و لكن هذا ما يعني بأن الطلعات و الرحلات المختلطة أمر عادي عندنا!
في لقطة شفتها بأم عيني شباب و بنات يسبحون في مسبح و الأم "هدى الخطيب" تسال واحد من الشله الفاسدة ليش ما يشاركهم؟؟ "مسكينه تشجع الرياضه و السباحه"
4- أمهاتنا مب فري و لا ييلسون في المطاعم و الكوفي شوبات.. لا و بدون شيلة بعد "حتى اذا وحده وايد فري أبسط شي تخاف من كلام الناس عليها"
5- الزواج من غير المواطنه.. نعم هو موجود عندنا و لكن أغلب الأسر ترفضه رفض تام "في المسلسل الكل متقبل الموضوع بأنه أمر عادي جدا"
6- أكثر الشباب تحررا في الامارات و الخليج و الدول العربيه بشكل عام، مستحيل يقبل يرتبط بوحده غلطت مع واحد قبله "خطيب يلدا في المسلسل كان وايد كول..و متفهم ما شاء الله"
7- المحاكم عندنا ما تزوج البنت بدون وجود ولي أمرها.. فما ادري كيف كانت بنت العايله المحترمه بتتزوج ولد خالها و اهلها ما يعرفون؟ "بس طلعت الام تعرف الأصول... قالت لها ليش ما عندج اهل؟ تو الناس"
للأسف الظاهر ان الكاتبه ما تعرف شي عن مجتمع الامارات..و لا عن طبيعته..
بس الله حق..
تعرف شوارعنا "كل شوي يطلعون صورة شارع الشيخ زايد في دبي"!!
مسلسل الامبراطوره
هذا بدون ما أشوفه، من عرفت الممثلين الى فيه توقعت نوعية العمل و فعلا طلع كله شرب و بنات و جرايم اختطاف و محاولة قتل "مافيا ايطاليه" و ممثلات نافخين براطمهم و ممثلين يسوون حركات عبيطه على اساس انها تضحك
باختصار مسلسل هابط بكل معنى الكلمة و ما يمثل مجتمع الكويت أو الخليج
طبعا الكاتبه فجر السعيد متوقعه مثل هالانتقادات (عندها سوابق) فكتبت ملاحظه في بداية المسلسل "هي نغزه مب ملاحظه":
القصه خياليه.. و نحن ما عندنا فساد و لا فقر و مجتمعنا مجتمع مثالي!
للأسف كلامها يدل بأنها ما فهمت الانقادات الى وجهت لها في السنوات الماضيه
الفساد موجود.. و الى ذكرته في اعمالها أكيد موجود... بس هي فئات قليلة ما تمثل مجتمع كامل
يعني الحين ما في قضايا في الكويت غير الاسر الغنية الى مشاكلهم ما تخلص و غير الشرب و الرقص؟؟
طبعا ردها لهالسؤال بيكون انها تطرح مشاكل المجتمع
و لكن هل باعمالها تحل هالمشاكل؟
طبعا لا... بالعكس تسيئ للمجتمع لا أكثر و لا اقل
بعدين ليش المسلسلات الخليجية القديمة كانت نظيفة؟ كانوا يناقشون قضايا تهم المجتمع بس بدون انحطاط و اسفاف
تتذكرون مسلسل الى ابي و أمي مع التحية "أتوقع الى يعرفونه من عمري أو اكبر"
مسلسل وايد قديم بس طرح مشاكل اسريه مختلفة.. مشاكل تربويه .. و بنفس الوقت كان ممتع وما فيه اسفاف
و طبعا الأمثله كثيره عن الفرق بين المسلسلات القديمة و بين المسلسلات الحين
اما المسلسلات الى سمعت عنها انها جيده، مسلسل جمرة الغضى وهو مسلسل اماراتي (فيه ممثلين من الامارات و دول الخليج)
بس بعد مسوين فيلم هندي... الابو مسجون في الهند سنين و يبى يطلع علشان يشوف بنته و ينتقم من اخته "ما ذكرتكم القصه بافلام اميتابشن؟"
شخصيا المسلسلين الى شفتهم في رمضان
فريج "عند العيايز كل شي يايز" - مسلسل كرتوني عن 4 عيايز اماراتيات
و الفريه (قصه عن فترة الخمسينات من كتابة حياة الفهد)
أتمنى بأن السنه اليايه الكاتبات في الخليج يرجعون شوي للواقع و المجتمع الى هم عايشين فيه
و أتمنى من التلفزيونات الخليجية ما تعرض هالكم الهائل من الأعمال و اذا عرضتها على الاقل تكون في رقابة.. مراعاة لعاداتنا و للشهر الفضيل!
مع تحياتي / الماسترو بوبو
10-23-2006, 07:16 PM
المسلسلات الخليجية الى أين..!
المواضيع المتشابهه
العرض العادي
