(( حصة تعبير ))
طبعآ كل واحد فينا درس مرت عليه ذي الماده السامجه اللي كل ابوها نصب بنصب
من يوم عرفت عمري والمواضيع هي نفسها ماتغيرت
يدخل عليك مدرس عليه نظاره تقوول واحد بيلحم
والعقاال كبير وفيه ذيل ومجدله بعد
ويقوول لك
عبر عن الشجره - اين قضيت الأجازه - المطر - الشعيب - اليوم الوطني - رمضان
كل موضوع له نصبه خاصه
يعني الشجرره لازم تقوول أن النخله أم الشجر
وأنها مرره ماتعطش
كنهم ماشافوا المزارع وش لون قايله نخلها
مايلات كن فيهم مرض الديسك الله يعافي المرضى
ويابسات ورايحه وطي
وأما موضوع اين قضيت الأجازه
والله ياافيه نصبااات من قلب
نصبااات عالميه بجد
اتذكر مرره يوم فطست ديانا الزينه حقت بريطانيا
راحت الأيام وجت وبعدها جتنا حصة تعبير
الظاهر ديانا يوم يصدمون كان صيفيه عندنا
طلع واحد من الشباب الله يهديه وقال موضوعه
وهو واقف عند السبووره ووراه المدرس وتشووفوون العج من الطباشير
قال الورع
انهم راحوا بالصيف لبريطانيا عشان يعزون اهل ديانا
والله ياناس يوم قالها تمنيت اني انط عليه واسوي حركة سنوكا الطائر
يلعن شكله
يقوول راح بريطانيا
لو أحلف مايتعدى شعيب المزاحميه
وعااد فيه ناس اذا طلعوا ودك مايسكتون
تلقاه كاتب رحنا الملاهي وقالت اختي لي رح جب تذكرتين ورجع الباقي عشان نشتري بطاطس
ويجيب لك عقد الشقه اللي استأجروها وكل شيء
هذا تستانس عليه وتنبسط
<< يحب اللقافه
يعني عندنا نوعيات في التعبير
اللي نصااب
واللي يكب عشاء أهله
واللي مافيه امل يكتب ويخلي امه تكتب له
أتذكر مرره كنت في خامس
قلت لأمي أكتبي لي تعبير
والله نااسي وش كان موضوعه
ورحت انام
قامت امي وكتبت لي الله يخليها لي
ويخلي لكم امهاتكم
في نص الموضوع داهمها النووم وسحبت على تعبيري
قمت الصبح متأخر وأخذ الدفتر وادعس
عاااد أنا واثق ان امي كاتبه لي
ومن يووم مادخل المدرس
وأنا ماااد يدي في خشته ابي اعبر قدام الطلاب
والله وشافني متمغط خاف اني اتقطع وطلعني
وقرريت الموضوع ووصلت للنقطه الحرجه
امي ماكملت الموضوع
يااولد وين الباقي قلبت الصفحااات
مافيه امل
قال المدرس وش فيك كمل
قعدت أصيح
شافني وأخذ الدفتر وعرف السالفه لأن الخط مو خط واحد صغير
كرشني على طوول برا الفصل
وقال لي
تعبر لي موضوعين الحين
------------ --------- --------- --
التعبير من المواد الكريهه عندي
ما أحبها
مرره في موضوع بالتعبير عن اليوم الوطني
كتبت اني احب المملكه واحب ديرتنا الغاط
قريت الموضوع قدام المدرس
وسوى لي مشكله
ليش اكتب الغاط
قلت له ديرتنا
وصاارت هوايل انا وياه
بالأخير
صار من الزلفي اللي جنب الغاط واهلها يكرهون اهل الغاط
بغيت اصيح عنده
يعني وصلت الدلاخه في المدرس يحط راسه براس ولد صغير عشان ديره ؟
أنا لو أني بنت ماراح أرضى يتزوجني مدرس تعبير
أخاف يقوول لي عبري عن حياتك بالطفووله ويجلس يصحح لي
أنا أحمد الله أن الكليات مافيها تعبير
ولا عز الله رحنا وطي
كان يجي واحد يقوول أنه راح سويسرا يحط فلوس خدامتهم بالبنك هناااك
عاد قووة تميلح قدام اخوياه
من ربع المهايطيه اللي يشتروون علبه البيبسي بريالين عناااد
------------ --------- -------
أكيد لكم ذكريات طيبه مع مواد التعبير
وخاصه البنات
تحصل المدرسه شايفه كوتش عاجبها وتطلب من البنات تعبير
بعنوان (( من وين شريتي الكوتش ))
عشاان تاخذ دفتر البنت وتعرف من وين
وتحصل البنت كاتبه
..
رحنا مع ابوي وعلى طريقنا مرينا الصراف بعدين دق جوال ابوي صار صديقه
وبعدها سكر ابوي الجوال ورحنا لسوق المعيقليه ودخلنا محل عبايات هع
(( في هذا الوقت المدرسه كرهت حياتها ))
الين توصل
ودخلت محل الجزم ولقيت كوتش عاجبني
(( هنا تتشقق المدرسه ))
بعدين تكتب البنت
بس مااما عيت اخذه وقالت لها ان اختك جايبه لك واحد هديه
..
هنا تضطر المدرسه تطلب من البنااات موضوع
(( وش اخر هديه جت من اختك ومن وين شرتها ))
خخخخخخخخخخخخخخخخخخخخ
وعلى ذا الحاال
مع تحياتي / الماسترو بوبو
10-13-2006, 07:04 PM
ســوالـيــف خـاثـرهـ ...!!
العرض العادي
